Apple се соочува со тужба во Лондон од група програмери на апликации, кои бараат околу две милијарди фунти, односно 2,33 милијарди евра отштета. Тие ја обвинуваат компанијата дека со своите правила за користење на корисничките податоци ја злоупотребува пазарната позиција и им наметнува построги ограничувања отколку на сопствените услуги.
Тужбата е поднесена пред британското судско тело надлежно за жалби во предмети поврзани со пазарната конкуренција, по повеќегодишно регулаторно следење на функцијата „App Tracking Transparency“, која Apple ја воведе во 2021 година.
Од компанијата тврдат дека оваа функција им овозможува на корисниците самите да одлучат дали ќе им дозволат на апликациите да ја следат нивната активност во други апликации и на интернет-страниците.
Тужителите, сепак, тврдат дека Apple им поставува построги правила на независните програмери при користењето кориснички податоци за насочено рекламирање, додека сопствените услуги на компанијата не се соочуваат со исти ограничувања. Според нив, со тоа Apple му дава предност на сопствениот рекламен бизнис во однос на конкуренцијата.
Постапката ја предводи поранешната функционерка на британското тело за заштита на конкуренцијата, Ен Поуп. Таа оцени дека политиката на Apple предизвикала значителна штета за компаниите чиј бизнис во голема мера зависи од платформата.
Apple ја брани функцијата како важна мерка за заштита на приватноста на корисниците, но засега не ја коментира конкретната тужба.
Правилата на Apple веќе се предмет на регулаторни постапки во повеќе европски земји. Во Германија, компанијата минатиот месец се согласи да ги измени правилата за користење лични податоци за насочено рекламирање, откако германскиот орган за заштита на конкуренцијата ја обвини за злоупотреба на пазарната моќ.
Слични постапки или проверки се спроведувале и во Франција, Италија и Полска.
