Членките на УЕФА едногласно го отфрлија предлогот на ФИФА за пренесување сопственички удели во Светското првенство и другите натпреварувања на приватни инвеститори, пренесува Би-би-си.
Според британскиот медиум, сите 55 членки на УЕФА изгласале можен бојкот на Светското првенство доколку ФИФА го реализира планот за продажба на удели во своите натпреварувања.
Одлуката била донесена на вонреден состанок на УЕФА, свикан поради предлозите што ФИФА ги објави во вторникот.
Доколку предлогот биде усвоен на претстојното гласање на членките на ФИФА, бојкотот би ги опфатил сите натпреварувања под нејзина организација, вклучувајќи ги Светските првенства во машка и женска конкуренција, како и Светското клупско првенство.
Во соопштението по состанокот, УЕФА нагласи дека настапува единствено заедно со своите 55 национални фудбалски сојузи.
„УЕФА и нејзините национални сојузи нема да учествуваат во натпреварувањата на ФИФА. Едногласно и недвосмислено го отфрламе предлогот сопственички удел во Светското првенство и другите натпреварувања на ФИФА да биде пренесен на приватни инвеститори“, се наведува во соопштението.
Од УЕФА додаваат дека Светското првенство не смее да се третира како инвестициски производ, бидејќи претставува едно од најголемите спортски наследства во светскиот фудбал.
„Тоа е натпреварување што со генерации го граделе фудбалерите, националните репрезентации и навивачите од сите континенти. Ниту еден негов дел не треба да биде предаден на приватни инвеститори. Светското првенство не е на продажба“, порачуваат од УЕФА.
Според планот на претседателот на ФИФА, Џани Инфантино, сите 211 членки на организацијата до 19 септември треба да се изјаснат за еднократна понуда од по 20 милиони долари, како дел од инвестициски план поврзан со Светското првенство.
Инфантино предложил формирање нова подружница на ФИФА, проценета на 20 милијарди долари, во која 20 проценти од сопственоста би им припаѓала на приватни инвеститори. Таа компанија би управувала со натпреварувањата и настаните под капата на ФИФА, меѓу кои Светското првенство во машка и женска конкуренција и Светското клупско првенство.
