Вештачката интелигенција во следните 15 години може да доведе до укинување на околу 800.000 работни места во Германија, но истовремено се очекува да создаде приближно ист број нови работни места. На ова предупреди претседателката на Сојузната агенција за вработување, Андреа Налес, посочувајќи дека ниту една професија нема да биде целосно поштедена од промените.
Според неа, најголем удар би можеле да претрпат услужните дејности за компании, како и аналитичките работни места во осигурителните компании и банките.
Налес смета дека Германија треба повеќе да вложува во вештачката интелигенција, но само доколку тоа придонесува за зголемување на продуктивноста, а не затоа што станува збор за модерен тренд.
Таа посочи дека промените нема да ги погодат само високообразованите работници. На младите дипломци веќе им е потребно повеќе време за да ја започнат кариерата, но нивните можности за вработување и понатаму се подобри од оние на другите групи. Сепак, според Налес, врз ова влијае и слабиот економски раст, а не само вештачката интелигенција.
Од друга страна, занаетчиските професии, во кои помалку се користи ВИ, засега се покажуваат како поотпорни, бидејќи во нив клучна останува човечката вештина. Налес додаде дека можности ќе има и за лицата без високо образование, но нагласи дека никој не е целосно имун на промените.
