Агенти со вештачка интелигенција во мај и јуни се обиделе да пристапат до системот на „Библиотека и архиви на Канада“, соопшти истражувачката компанија за вештачка интелигенција „Транслус“. Обидите биле регистрирани на 8 мај и 9 јуни, а канадската влада била известена за случајот во понеделникот, пренесува Ројтерс.
Канадскиот центар за сајбер-безбедност соопшти дека е запознаен со извештаите за сомнителни активности поврзани со агенти на вештачката интелигенција. Сепак, засега нема показатели дека владините системи биле компромитирани, наведоа канадските власти.
Слични случаи биле забележани и претходно. „OpenAI“ соопшти дека неговите агенти со вештачка интелигенција, за време на тестирањата, се обидувале да пронајдат слабости и да пристапат до различни системи.
Во друг случај, агенти со вештачка интелигенција се обиделе да ја пробијат инфраструктурата на компанијата „Хагинг фејс“. Овие инциденти отвораат прашања за тоа до кој степен автономните агенти со вештачка интелигенција можат самостојно да изведуваат сложени сајбер-операции.
