Вештачката интелигенција сè побрзо го менува начинот на кој се создава и шири содржина на интернет, а доколку продолжат актуелните трендови, содржината создадена со ВИ би можела да достигне и до 90 проценти од интернетот до крајот на 2026 година.
Сепак, оваа бројка треба да се земе со резерва, бидејќи не постои единствена методологија со која прецизно може да се измери колкав дел од интернет-содржините се создадени со вештачка интелигенција. Различните анализи опфаќаат различни категории – од текстови и фотографии до видеа, автоматизирани профили и содржини во кои ВИ е користена само делумно.
Податоците сепак укажуваат на јасен тренд на брзо зголемување на употребата на ВИ на најголемите интернет-платформи. Според податоците наведени во анализата, содржината генерирана со ВИ во мај 2025 година достигнала удел од околу 52 проценти во одредени делови од јавниот интернет.
На LinkedIn, анализата на примерок од 99 истакнати профили покажала дека 53,7 проценти од подолгите објави биле оценети како веројатно создадени со ВИ. Кај Reddit, пак, уделот на објави за кои се проценува дека се генерирани со ВИ се зголемил од 13 проценти во 2024 година на 14,7 проценти во 2025 година.
Особено брзо се шири синтетичката содржина на YouTube. Анализа на 15.000 канали идентификувала 278 канали чија содржина била целосно или речиси целосно создадена со ВИ. Тие канали, според проценките, имаат повеќе од 63 милијарди прегледи и генерираат околу 117 милиони долари годишен приход. Во анализата на YouTube Shorts, ВИ-содржина била забележана во околу 21 процент од првите 500 видеа препорачани на нов корисник.
И TikTok бележи масовна употреба на технологијата. Платформата има означено повеќе од 1,3 милијарди видеа создадени или изменети со ВИ, додека според поширока дефиниција, околу 52 проценти од видеата содржеле некаква форма на употреба на вештачка интелигенција.
Големи количини ВИ-содржина се регистрираат и на платформите на Meta. На Facebook биле забележани повеќе од 360 милиони означени содржини со ВИ, а на Instagram повеќе од 330 милиони. Овие бројки, сепак, не значат дека сите содржини биле целосно генерирани со ВИ, бидејќи дел од нив можеле да содржат само филтри, изменети фотографии или други елементи создадени со оваа технологија.
Паралелно со растот на ВИ-содржините, расте и автоматизираниот интернет-сообраќај. Според извештајот на Imperva за 2025 година, автоматизираниот сообраќај за првпат по една деценија надминал 51 процент од вкупниот интернет-сообраќај, при што таканаречените лоши ботови сочинувале околу 37 проценти. Тоа, сепак, не значи дека половина од интернет-содржините се создадени со ВИ, бидејќи автоматизираниот сообраќај опфаќа различни видови ботови и автоматизирани системи.
Проблемот дополнително го зголемуваат таканаречените фарми за содржина. Следењето на NewsGuard идентификувало 3.006 веб-страници на 16 јазици кои функционираат како автоматизирани или полуавтоматизирани извори на ВИ-содржина. Целта на ваквите страници најчесто е со минимална човечка интервенција да произведат голем број текстови и да привлечат посетеност преку пребарувачите и социјалните мрежи.
Расте и бројот на автоматизирани профили. Една студија објавена во „Scientific Reports“ проценила дека околу 20 проценти од анализираните профили на X во 2025 година можеле да бидат лажни или автоматизирани. Дополнително, проценките укажуваат и на драматичен раст на deepfake-содржините – од околу 500.000 во 2023 година на приближно осум милиони во 2025 година.
Токму затоа, прогнозата дека 90 проценти од интернетот би можеле да бидат ВИ-содржини до крајот на 2026 година не треба да се сфаќа како сигурна прогноза. Таа се темели на продолжување на досегашниот тренд, додека различните истражувања користат различни дефиниции и примероци.
Она што е неспорно е дека генеративната ВИ веќе стана масовна алатка за создавање текстови, фотографии, видеа, гласови и други дигитални содржини. Со тоа станува сè потешко за корисниците да препознаат што е автентично, а што е создадено или изменето со ВИ.
