„Вибер“ воведе две нови функции засновани на вештачка интелигенција – „Вести за вас“ и „Преглед на непрочитани пораки“, кои се достапни и за корисниците во Србија. Функциите користат технологија на ChatGPT и се наменети за полесно следење на дневните вести и побрзо прегледување на пропуштените пораки.
Функцијата „Вести за вас“ автоматски создава дневен преглед на вести според темите и интересите што корисникот однапред ги избрал. Освен утринскиот преглед, персонализираните вести може да се побараат во кој било момент преку опцијата „Преземи вести сега“.
„Преглед на непрочитани пораки“, пак, е наменет за корисниците кои имаат голем број непрочитани пораки во разговорите. Вештачката интелигенција ги анализира пропуштените пораки и создава краток преглед на разговорот, по што корисникот може да избере дали ќе ги означи како прочитани, ќе ги зачува или веднаш ќе се вклучи во разговорот.
Од „Вибер“ наведуваат дека речиси една третина од корисниците во секој момент имаат 20 или повеќе непрочитани пораки, па новата функција треба значително да го скрати времето потребно за нивно прегледување.
Компанијата посебно ја нагласува заштитата на приватноста. При создавањето на прегледот, ChatGPT има пристап само до непрочитаните пораки и до имињата на учесниците што се неопходни за создавање на текстот.
Новите функции се дел од поширокото глобално партнерство меѓу „Ракутен Вибер“ и „ОпенАИ“. На платформата веќе се достапни и други алатки со вештачка интелигенција, меѓу кои посебен разговор со ChatGPT, негово означување со @ChatGPT во групни разговори, сумирање на интернет-врски, како и алатки за уредување фотографии и текстуални пораки и нивно преведување.
