Пејачот Аца Лукас доживеал сообраќајна несреќа пред настапот во Битола, поради што неговиот концерт, кој требало да се одржи вечерва, е одложен за утре.
Лукас лично им се обрати на своите обожаватели преку видеопорака и објасни дека поради несреќата не може навреме да пристигне во Битола.
„Драги мои, едно големо извинување ѝ должам на публиката во Битола. Имав сообраќајна несреќа“, рече пејачот, покажувајќи ги последиците од незгодата.
Тој потврди дека концертот ќе се одржи утре навечер, а билетите што веќе се купени ќе останат важечки.
Лукас најави дека веднаш штом ќе ја среди ситуацијата по несреќата ќе продолжи кон Битола. Неговиот бенд веќе е во градот, а сцената и целата организација се подготвени за настапот.
Пејачот им се извини на обожавателите поради одложувањето и вети дека утрешниот концерт ќе биде уште подолг и подобар.
