Подготовките за македонскиот настап на Јуниорскиот Евросонг 2026 продолжуваат, откако Македонската радио-телевизија ги претстави песната „Идната Јас“ и нејзиниот официјален видеозапис. Со оваа песна Ана Стојаноска ќе ја претставува Македонија на музичкиот натпревар што годинава ќе се одржи во Малта.
„Идната Јас“ е посветена на детските соништа, самодовербата и храброста младите да го следат сопствениот пат и да останат верни на себе додека растат.
Музиката ја потпишува Николче Мицевски, а автор на текстот е Илчо Нечовски. Видеозаписот е изработен во продукција на Македонската радио-телевизија, со колоритен и динамичен визуелен пристап кој ја следи атмосферата и пораката на песната.
Стојаноска потекнува од Струга, а со музика и пеење се занимава уште од најрана возраст. На сцената во Малта таа ќе настапи со танчерките Калина, Каја и Елена. За кореографијата е задолжен Илија Карадакоски, додека македонската делегација ја предводи шефот на делегацијата Дијана Гогова.
До настапот тимот продолжува со интензивни подготовки за сценската изведба и за претставувањето на Македонија пред европската публика.
Јуниорскиот Евросонг 2026 ќе се одржи на 24 октомври во Малта. Директниот пренос на натпреварот ќе биде на МРТ1, со почеток во 21 часот.
Песната „Идната Јас“ и официјалниот видеозапис се достапни на дигиталните платформи и на официјалните канали на Македонската радио-телевизија.
