Елиминацијата на Уругвај од Светското првенство речиси сигурно значи и крај на мандатот на селекторот Марсело Биелса на клупата на националниот тим.
Аргентинскиот стратег има договор до крајот на турнирот, но по дебаклот и елиминацијата без ниту една победа во групата со Шпанија, Саудиска Арабија и Зеленортските Острови, тешко е да се очекува продолжување на соработката.
По поразот од Шпанија со 1:0 во последното коло, во натпревар во кој на Уругвај му беше потребен позитивен резултат, Биелса направи инцидент пред камерите. Додека чекаше да даде изјава за медиумите, видно изнервиран ѝ се развика на новинарка.
„Доста веќе!“, извика Биелса, очигледно нетрпелив што поскоро да ја напушти медиумската зона.
Познато е дека 70-годишниот тренер нема најдобар однос со медиумите, но ваквиот испад предизвика изненадување, бидејќи изјавите по натпреварите се задолжителен дел од протоколот.
Една од темите на прес-конференцијата беше и неочекуваното повлекување на голманот и капитен Фернандо Муслера на полувремето, откако искусниот 40-годишен чувар на мрежата направи грешка при водечкиот гол на Алехо Баена во 42. минута.
„Тој одлучи да излезе“, кусо одговори Биелса, а на дополнително прашање за истата тема само повтори:
„Веќе одговорив на тоа.“
