Бојан Јовановски, познат како Боки 13, најави дека следната година планира повторно да одржи голем концерт во Охрид, град за кој, како што рече, го врзуваат некои од најубавите моменти во неговата кариера.
Во „Вечер во Охрид со Ландов и Вик“ тој се потсети на периодот кога настапувал во тогашниот хотел „Инекс Горица“.
„Еден цел месец во Охрид, секој ден имав концерти. Триесет дена – триесет концерти во ‘Инекс Горица’, на плажата“, рече Јовановски.
Тој потсети дека на 29 јули 2007 година го одржал својот прв голем концерт на стадионот во Охрид, каде што пристигнал со хеликоптер.
„Првиот свој голем концерт го одржав на 29 јули 2007 година, на охридскиот стадион, каде што слетав со хеликоптер. Јас сум првиот македонски изведувач што воопшто одржал концерт на охридскиот стадион. Беше преполно и беше преубаво“, изјави Боки 13.
Јовановски рече дека годинава размислувал за концерт во Охрид, но наместо тоа го организирал настапот во Битола.
„Оваа година имав намера да одржам концерт во Охрид, но се случи Битола. Мислам дека уште сега можам да најавам дека тоа ќе се случи наредната година“, рече тој.
Боки 13 смета дека се разликува од класичните пејачи и дека неговата главна предност е целосниот сценски настап.
„Јас сум еден и единствен изведувач што не може да се спореди со ниту еден пејач. Јас сум изведувач што го следат повеќе други чинители во сите овие 25 години кариера. Сметам дека шоу по светски стандарди, колку и да звучи претенциозно, можам да направам само јас“, изјави Јовановски.
