Античкиот театар во Охрид синоќа беше исполнет со љубителите на музиката на Жељко Самарџиќ, кој одржа концерт исполнет со своите најголеми хитови и емотивни пораки до публиката.
Веднаш по излегувањето на сцената, пејачот им се обрати на присутните, истакнувајќи дека и покрај бројните патувања, настапот во Охрид има посебно значење за него.
„Многу патувавме овие денови, но ова е величествено и убаво, мило ми е што ве гледам сите насмеани!“, им порача Самарџиќ на присутните од сцената на Античкиот театар.
Во текот на концертот тој испрати и емотивна порака за Македонија, која беше поздравена со силен аплауз од публиката.
„Многу ве сакам, најмногу! Единствено знаме кое патува со мене по цел свет е македонското! Верувајте ми, од срце. Секаде го носам со себе. Македонија ми остана како Југославија. Сакам да поминам низ македонските села, да ги гледам старите трактори, куќи, сѐ ми мириса на младост. Тоа е мојата Македонија. Драго ми е што и тука гледам луѓе кои доаѓаат на моите концерти и во Белград“, рече Самарџиќ.
Публиката во Охрид заедно со него ги отпеа неговите најпознати песни, а концертот помина во атмосфера исполнета со емоции, аплаузи и заедничко пеење, со што уште еднаш беше потврдено дека Жељко Самарџиќ останува еден од најомилените регионални изведувачи кај македонската публика. Концертот го организираше Балкан медиа.
