Новак Ѓоковиќ беше една од главните ѕвезди на свеченото отворање на тенискиот центар „Додиг“ во Меѓугорје, каде што пред илјадници гледачи приреди вистински спектакл.
Српскиот тенисер настапи на егзибициски меч во двојки заедно со Мате Павиќ, додека на спротивната страна беа Иван Додиг и Марин Чилиќ. Иако се играше натпревар, резултатот беше во втор план, а атмосферата беше исполнета со забава и добро расположение.
Во текот на мечот, Ѓоковиќ ја забавуваше публиката со атрактивни потези, духовити коментари, шеговити реакции кон судиските одлуки, па дури и со песна, што предизвика воодушевување кај присутните.
Тој на шега рече дека никако не успева да ги исфрли од ритам Додиг и Чилиќ, а неговите досетки беа проследени со громогласен аплауз од трибините.
Меѓу гледачите беше и поранешниот тренер на Ѓоковиќ, легендарниот германски тенисер Борис Бекер.
Ова беше прво појавување на Новак на тениски терен по настапот на Вимблдон, каде што беше елиминиран во полуфиналето од светскиот рекет број еден, Јаник Синер.
Новиот тениски комплекс во Меѓугорје се простира на околу 25.000 квадратни метри и располага со шест тениски терени, меѓу кои и централен терен со капацитет од околу 2.000 гледачи. Планот на семејството Додиг е центарот да стане место за развој на млади тенисери и домаќин на меѓународни турнири.
