Златан Ибрахимовиќ го прослави својот 45. роденден со подарок во свој стил – нов автомобил Ferrari F80, еден од најексклузивните модели на италијанскиот производител.
Поранешниот фудбалер и голем љубител на автомобили со години го збогатува својот возен парк со скапоцени модели, а овојпат изборот падна на автомобил кој не може да се купи едноставно само затоа што некој има доволно пари.
Ferrari ќе произведе само 799 примероци од F80, кој е наследник на серијата легендарни модели GTO, F40, F50, Enzo и LaFerrari.
F80 беше претставен во 2024 година, со почетна цена од околу 3,6 милиони евра. Сите 799 примероци беа наменети за избрани клиенти на Ferrari, што ја покажува ексклузивноста на моделот.
За погон е задолжен хибриден систем со вкупна моќност од 1.200 коњски сили. Интересно е што автомобилот нема ниту V12 ниту V8 мотор, туку 3,0-литарски V6, кој сам развива 900 КС.
Дополнителни 300 КС доаѓаат од хибридниот систем со напон од 800 волти, со електричен погон на предните тркала и електромотор назад. Технологијата на моторот е поврзана со тркачкиот Ferrari 499P, кој победуваше на 24 часа Ле Ман.
F80 од 0 до 100 км/ч стигнува за околу 2,15 секунди, до 200 км/ч забрзува за помалку од шест секунди, а максималната брзина му е 350 км/ч.
Иако е регистриран за две лица, кабината е асиметрично дизајнирана така што возачот има чувство како да седи во едносед. Ferrari овој концепт го нарекува „1+“.
Каросеријата и шасијата во голема мера се изработени од јаглеродни влакна, а автомобилот има активна суспензија и активно задно крило. При брзина од 250 км/ч може да создаде до 1.050 килограми аеродинамички потисок.
Производството е ограничено на 799 примероци и треба да трае до 2027 година, кога Ferrari ќе ја одбележи 80-годишнината.
F80 е само најновото Ferrari во колекцијата на Ибрахимовиќ. Во неговата гаража во текот на годините се најдоа и Ferrari Monza SP2, Daytona SP3, SF90 Spider и Purosangue.
Со овогодишниот роденденски подарок, Ибрахимовиќ во колекцијата добива еден од најретките и најмоќните патнички модели што Ferrari досега ги има произведено.
