Сидни Свини денес полни 29 години. Американската актерка, родена на 12 септември 1997 година во Спокен, Вашингтон, за само неколку години стана едно од најпрепознатливите лица на новата холивудска генерација, но и актерка чиј изглед неретко предизвикува повеќе јавни коментари од нејзините улоги.
Пошироката публика ја запозна како Кеси Хауард во серијата „Еуфорија“, каде што толкува емотивно сложена млада жена која се бори со несигурностите и потребата да биде прифатена. Пред тоа се појави во „The Handmaid's Tale“, „Sharp Objects“ и „Everything Sucks!“.
Нејзината филмографија го вклучува и филмот „Once Upon a Time in Hollywood“ на Квентин Тарантино, а Свини паралелно со актерството влезе и во продукциските води. Таа ја основа продукциската куќа „Fifty-Fifty Films“, со намера да развива проекти во кои женските ликови и перспективи ќе имаат позначајно место.
Но, голем дел од јавниот интерес за неа постојано е насочен кон нејзиниот изглед. Во медиумите често е опишувана како една од најатрактивните актерки на денешницата, а нејзините пропорции беа предмет дури и на анализи според таканаречениот „златен пресек“.
Пластичниот хирург Онур Гилард изјави дека нејзините црти на лицето се симетрични и блиску до пропорциите што се поврзуваат со „златниот пресек“, додавајќи дека слични пропорционални анализи може да се применат и на фигурата.
Самата Свини, сепак, во повеќе наврати зборуваше за тоа колку ѝ пречи кога јавноста ја сведува само на физичкиот изглед.
„Најголемата заблуда што луѓето ја имаат за мене е дека сум само глупава русокоса со големи гради“, има изјавено актерката.
Во интервју за „Glamour UK“ откри дека како тинејџерка токму поради градите се чувствувала несигурно и размислувала за нивно намалување кога ќе стане полнолетна.
„Кога бев во средно училиште, знаев да се чувствувам непријатно поради големината на градите и велев дека кога ќе наполнам 18 години ќе ги намалам“, раскажа таа.
Од операцијата ја разубедила нејзината мајка, а денес Свини има сосема поинаков однос кон своето тело.
„Ми се допаѓаат. Тие се мои најдобри пријателки“, изјави актерката, порачувајќи им на другите жени да го прифатат она што го имаат и да се чувствуваат самоуверено во сопственото тело.
Една од најголемите полемики околу неа ја предизвика искусната холивудска продуцентка Керол Баум, која јавно ги нападна и нејзиниот изглед и актерските способности.
„Не ја разбирам Сидни Свини“, рече Баум, откако го гледала филмот „Anyone But You“, кој го опиша како „негледлив“.
Баум отиде и подалеку, раскажувајќи дека на своите студенти им поставила прашање зошто Свини е толку популарна.
„Не е убава, не знае да глуми. Зошто е толкава вревата околу неа?“, рече продуцентката.
Свини не остана без одговор.
„Колку е тажно што жена која е во позиција да го сподели своето знаење и искуство наместо тоа одлучува да нападне друга жена. Ако тоа е она што го научила во децениите работа во индустријата и смета дека е соодветно на тоа да ги учи своите студенти, тогаш тоа е срамно“, порача актерката.
Потоа следуваше и многу покус, но далеку повпечатлив одговор на „Инстаграм“:
„Извинете што имам одлични гради“.
Свини во 2023 година се појави и во спотот на „Ролинг стоунс“ за песната „Angry“, дополнително зацврстувајќи го статусот на едно од најекспонираните лица во поп-културата.
На 29 години, зад неа веќе има големи телевизиски и филмски проекти, сопствена продукциска компанија и огромна медиумска изложеност – со која, судејќи според нејзините досегашни одговори, одамна научила да се справува.
