Настапот на српската пејачка Јелена Карлеуша во клубот „Хациенда“ во Водице е откажан, откако најавениот концерт предизвика бројни реакции во хрватската јавност поради нејзините претходни политички изјави.
Од клубот официјално соопштија дека реакциите ја надминале рамката на музички настан и дека безбедноста на гостите и вработените им е приоритет.
По откажувањето, Карлеуша во телефонски разговор за „RTL Danas“ изјави дека очекувала ваква одлука и дека, според неа, нејзините изјави биле извадени од контекст.
„Жал ми е поради тоа, бидејќи никогаш во животот немам кажано ниту еден збор против хрватскиот народ, ниту ќе кажам. Тоа е голема манипулација и извртување на моите зборови“, изјави пејачката.
Карлеуша се осврна и на нејзина претходна изјава поврзана со трагедијата во Нови Сад, за која во јавноста беше пренесено дека посакала слична трагедија да се случи во Хрватска. Таа тврди дека не го кажала тоа на тој начин и дека дел од нејзината изјава бил изоставен.
„Зборував за мешањето на хрватски јавни личности, медиуми и политичари во една многу тешка политичка ситуација во Србија“, рече Карлеуша, додавајќи дека сакала да посочи колку би било лошо доколку слична трагедија се случи во Хрватска.
Таа нагласи дека има политички ставови и ја поддржува својата земја и претседателот, но повтори дека никогаш не зборувала против хрватскиот народ.
Концертот во „Хациенда“ требаше да се одржи на 15 август, за време на празникот Голема Богородица. Откако најавата предизвика негативни реакции и повици за бојкот, за настапот се огласи и градоначалникот на Водице, Анте Цукров, кој порача дека Карлеуша не е добредојдена.
Иако клубот првично соопшти дека нема причина концертот да биде откажан, подоцна ја промени одлуката и потврди дека настапот нема да се одржи.
