Кина официјално го пушти во употреба најголемиот центар за пресметки со вештачка интелигенција во светот. Индустрискиот комплекс „Envision Galaxy Campus“ е отворен во градот Уланкаб, во автономниот регион Внатрешна Монголија.
Компанијата „Envision Group“, која стои зад проектот, соопшти дека станува збор за најголемиот поединечен центар за обработка на податоци за вештачка интелигенција во светот, според капацитетот за обработка на токени.
Комплексот се простира на површина од 120.000 квадратни метри и е проектиран да поддржи работа на дури еден милион графички процесорски единици (GPU) истовремено. Планираниот вкупен капацитет на центарот изнесува два гигавати.
Една од неговите главни карактеристики е што повеќе од 80 проценти од потребната електрична енергија доаѓа директно од обновливи извори, што го прави еден од најголемите центри за вештачка интелигенција напојувани со зелена енергија.
Проектот е дел од иницијативата „Mission Gobi“, преку која „Envision Group“ планира до 2030 година да изгради вкупно пет гигавати зелени капацитети за вештачка интелигенција во пустински и сушни региони низ светот.
Идејата е големите центри за обработка на податоци да бидат директно поврзани со капацитети за производство на обновлива енергија и системи за нејзино складирање, со што значително ќе се намали потрошувачката на електрична енергија од класичните извори.
