Новата криминалистичка серија „Немезис“ на Нетфликс стана најгледаниот стриминг-наслов во светот, нешто повеќе од еден месец по нејзината премиера.
Серијата остварила дури 1,31 милијарда прегледи, со што се вброи меѓу најгледаните продукции на Нетфликс во текот на оваа година.
Сите осум едночасовни епизоди беа објавени на 14 мај, а форматот наменет за маратонско гледање се покажа како полн погодок кај публиката. Главните улоги ги толкуваат Тре Хејл, Клеопатра Колман, Доминик Ломбардоци, Метју Ло и Ајлан Ноел.
Дејството е сместено во Лос Анџелес, каде безмилосен детектив и брилијантен крадец се впуштаат во опасна игра на опсесија што ги турка до крајните граници. Во обид да се надмудрат еден со друг, тие ги ризикуваат своите кариери, семејства и слобода, свесни дека само еден од нив може да излезе како победник.
Серијата ја создадоа Кортни А. Кемп и Еван Винсент Вашингтон. Кемп е позната по работата на франшизата „Power“, додека како шоуранер е потпишана Тани Марол. Сценариото го напишаа Моника Мичел, Мајк Флин и Габриела Урибе.
Режијата ја потпишуваат Марио Ван Пиблс, Милисент Шелтон, Роб Харди и Рубен Гарсија.
На платформата за оценки „Rotten Tomatoes“, серијата моментално има 76 проценти позитивни оценки од критичарите, додека публиката ѝ доделила оценка од 52 проценти.
