Шпанскиот фудбалер Марк Кукуреља за првпат јавно проговори за животот со својот четиригодишен син Матео, на кого му е дијагностициран аутизам. Во емотивно интервју, тој призна дека му е исклучително тешко да зборува на оваа тема и не успеа да ги задржи солзите.
„Ова е првпат да зборувам за тоа и навистина ми е тешко. Многу страдам и не знам како да му помогнам, особено кога гледам дека не му е добро. Многу сум емотивен, но чувствувам дека треба да го споделам моето искуство“, изјави Кукуреља.
Тој додаде дека темата за аутизмот особено го погодува.
„Тоа е нешто што ме прави многу чувствителен. Ова е првпат јавно да зборувам за тоа... Еве, погледнете што ми направивте“, рече фудбалерот низ солзи.
Неговата сопруга Клаудија Родригес претходно откри дека таа и Кукуреља поминале низ многу тежок период кога сфатиле дека нивниот син се развива поинаку од своите врсници.
„Матео се роди пред четири години и забележавме дека се разликува од другите деца. Немавме доволно поддршка во градинката и тоа беа најтешките месеци за нас. Секојпат кога го остававме таму, плачевме“, изјавила таа.
Таа додала дека семејството и понатаму секојдневно се соочува со предизвици во потрагата по соодветно училиште, терапии и услови што ќе му помогнат на нивниот син.
„Многу работи се променија, но не е лесно да се најдат соодветно училиште, терапија, па дури ни исхрана“, рекла таа.
Кукуреља откри и дека не планира да се откаже од својата препознатлива долга виткана коса. Причината, како што објасни, е неговиот син Матео, кој така полесно може да го препознае на теренот додека ги следи неговите натпревари. Според фудбалерот, тоа е мал, но значаен начин да му даде чувство на сигурност и блискост.
