Марко Пејчиновски најави дека целата заработка од продажбата на неговата книга ќе биде наменета за хуманитарни цели, откако поради операција на рамото во моментов не може да го изведе планираниот пливачки подвиг.
Во „Вечер во Охрид со Ландов и Вик“, Пејчиновски рече дека се обидува постепено да му се врати на пливањето, но состојбата со рамото не му дозволува да се изложи на голем физички напор.
„Во моментов гледам да му се вратам на пливањето, затоа што имав операција на рамото и гледам да го вратам рамото. Сакав да направам еден хуманитарен настан, кој, за жал, нема да можам да го направам токму поради рамото, бидејќи не можам да изведам никаков спортски подвиг“, рече Пејчиновски.
Наместо планираниот настан, тој одлучил во хуманитарни цели да ги насочи приходите од својата книга.
„Бидејќи физички не можам да го направам настанот што го планирав, од денеска најавувам дека целата заработка од книгата што во моментов се продава ќе оди за хуманитарни цели“, изјави Пејчиновски.
Книгата е насловена „Во чекор со судбината“, а може да се нарача со порака преку неговите профили на социјалните мрежи.
„Во книгата е опишан мојот живот приближно до 2022 година. Не се опишани само спортските подвизи, туку целото патешествие и мојата животна приказна. Таа не само што може да инспирира и мотивира, туку може многу да им помогне на луѓето и на семејствата што поминуваат низ истото или низ нешто слично“, рече тој.
