Мартин Филиповски првично не сакал „Некст тајм“ да ја сними песната „Океани“ со Марко Маринковиќ – Слаткаристика, бидејќи сметал дека текстот повторно ги враќа кон темите за вино, ракија и кафана.
Браќата Филиповски во „Вечер во Охрид со Ландов и Вик“ открија дека соработката почнала откако Слаткаристика им се јавил со веќе подготвена замисла.
„Марко ми се јави и рече: ‘Имам песна за која сметам дека вие најдобро ќе ја изведете заедно со мене. Ве гледам во неа. Дали сакате да направиме заедничка песна?’ Го слушнавме примерокот и веднаш видов дека текстот е одличен“, раскажа Стефан.
Сепак, Мартин не бил воодушевен од првото слушање.
„Кога му ја пуштив на Мартин, не му се допадна. Не му се допаѓаше делот со ‘пијам вино, ракија’ и рече: ‘Кафана, пак кафана’“, откри Стефан.
Тој го убедувал својот брат да не го гледа текстот само низ тие зборови, туку да се насочи кон неговата целосна емоција.
„Му реков: ‘Не е сè во тоа. Не гледај го така текстот, гледај ја емоцијата’. Сметам дека имаше право што ме послуша и што ни веруваше и мене и на Марко. Песната излезе како што излезе и беше многу добро прифатена“, рече Стефан.
