Сериозен инцидент изби во Атланта во пресрет на полуфиналниот натпревар на Светското првенство меѓу Аргентина и Англија, но наместо судир меѓу навивачите на двете репрезентации, дојде до пресметка меѓу аргентински навивачи.
Според медиумските извештаи, во јавен парк се судриле групи навивачи поврзани со аргентинските клубови Сан Лоренцо и Уракан, долгогодишни ривали.
За време на тепачката биле фрлани стаклени шишиња, канти за отпадоци, клупи и метални маси. Полицијата интервенирала за помалку од две минути и го прекинала инцидентот, а според снимките од местото на настанот, најмалку едно лице било приведено.
Во Атланта пристигнал голем број аргентински навивачи, а се очекува тие да бидат побројни од англиските на трибините. Дел од нив допатувале без билети и натпреварот ќе го следат во навивачките зони.
Поради големото ривалство меѓу Аргентина и Англија, безбедносните мерки се на највисоко ниво. За обезбедување на натпреварот ќе бидат ангажирани околу 1.600 полицајци, а навивачите ќе бидат насочувани кон одвоени влезови.
На стадионот ќе биде забрането внесување политички и расно провокативни пораки, како и знамиња и транспаренти поврзани со Фокландските, односно Малвинските Острови. Победникот од дуелот Аргентина – Англија во финалето ќе се соочи со Шпанија.
