Необичен летечки објект, кој очевидците го опишуваат како џиновска медуза, бил забележан над шумска област во близина на американска воена база на Алјаска, пред да исчезне за само неколку минути.
Сара Џејн Озборн за „Дејли мејл“ раскажала дека на 15 јуни, околу 22:13 часот, го фотографирала виножитото во Енкориџ, кога над дрвјата забележала темен објект во близина на воената база „Џоинт бејс Елмендорф-Ричардсон“. Во базата се распоредени борбени авиони Ф-22 „Раптор“, а таа има важна улога во воздушната одбрана и воениот транспорт.
Објектот, според нејзиниот опис, имал висечки делови што се движеле независно еден од друг, додека тој лебдел и се вртел на двете страни. Озборн проценила дека бил видлив околу три минути, по што речиси ненадејно исчезнал.
Таа и нејзиниот сопруг Пит првично помислиле дека станува збор за инсект, но кога подобро погледнале, забележале необична форма. Озборн направила неколку фотографии и кратка видеоснимка, а подоцна истакнала дека објектот бил црно-сребрен и не личел на змејовите што вообичаено се пуштаат во градските паркови.
Сопружниците забележале дека дува ветер, но, според нив, не бил доволно силен за да носи толку голем змеј. Ги збунило и движењето на објектот, како и фактот што останал во воздухот само неколку минути.
По настанот, тие отишле до блискиот парк, а потоа пребарувале и од други места во околината, обидувајќи се да откријат што виделе. Потрагата траела околу половина час, но не пронашле ниту змеј ниту лице што би можело да управува со него.
Според нивната процена, објектот се наоѓал над шумско земјиште поврзано со воената база, но неговата точна оддалеченост и големина не биле утврдени. Озборн не ја исклучила можноста да станува збор за дрон или друг обичен летечки објект, но признала дека не успеала да најде логично објаснување.
„Само Бог и владата знаат што е тоа“, изјавила таа, додавајќи дека досега не успеале да пронајдат други очевидци на необичната појава.
Засега нема докази дека објектот бил поврзан со воената база или дека имал вонземско потекло.
