НАСА објави нова снимка од површината на Марс на која се гледа изгрејсонцето над карпести предели стари милијарди години. Снимката ја направил роверот „Кјуриосити“, кој продолжува да ја истражува геологијата и климата на Црвената планета.
„Кјуриосити“ слета на Марс во 2012 година, во кратерот Гејл, во близина на марсовиот екватор. Од 2014 година постепено се искачува по планината Шарп, висока околу пет километри, која се издигнува од дното на кратерот.
Снимката е направена со камерата „Масткам“ околу еден час по изгрејсонцето. Во далечината се гледаат карпи, гребени и карпи обликувани од ветерот.
Научникот Ешвин Васавада од НАСА објаснува дека светлите карпести врвови во далечината припаѓаат на слој кој значително се разликува од слоевите низ кои роверот досега поминал. Според него, слојот можеби некогаш бил составен од седимент што го носел ветерот, како песок или пепел што пристигнал во кратерот поради вулканска активност во близина.
Откако седиментот се претворил во карпа, ветерот во текот на милиони години ја обликувал нејзината површина во гребени познати како јарданги. Научниците сметаат дека овој слој настанал пред околу три милијарди години и се протега на околу 16 километри долж северозападниот дел на планината Шарп.
Васавада посочува дека овој слој најверојатно не е дел од непрекинатиот низ на слоеви од кои е составена планината, туку дека настанал подоцна, над геолошки дисконтинуитет, односно период во кој претходните слоеви еродирале пред да се наталожат нови.
Во текот на постепеното искачување на планината Шарп, „Кјуриосити“ совладал висинска разлика поголема од еден километар, што според НАСА е најголемата височина достигната од ровер на Марс.
Слоевите на планината Шарп содржат траги од различни периоди од геолошката историја на Марс. Нивното проучување им помогнало на научниците да дознаат повеќе за езерата и потоците кои некогаш постоеле во овој дел од планетата, во период кога Марс бил потопол и повлажен од денес.
НАСА очекува „Кјуриосити“ да стигне до слојот на јардангите во 2027 или 2028 година, кога неговите инструменти треба детално да го проучат неговиот геолошки состав.
Роверот ја истражува геологијата и климата на Марс и се обидува да утврди дали во минатото на планетата постоеле услови погодни за живот на микроорганизми. Покрај „Кјуриосити“, Марс моментално го истражува и роверот „Персеверанс“, кој се движи долж работ на кратерот Језеро.
Васавада ја споредил новата снимка со патување низ Долината на спомениците во американската сојузна држава Аризона, но нагласил дека портокаловото небо и синкавите нијанси на изгрејсонцето јасно покажуваат дека сцената е снимена на Марс.
