Доналд Трамп и неговата сопруга Меланија повторно привлекоа внимание на социјалните мрежи, откако снимка од нивната средба во Белата куќа предизвика бројни коментари. Корисниците особено реагираа на моментот кога американскиот претседател ја потапка сопругата по раката, како и на неговиот обид да ја бакне.
На снимката се гледа како Трамп, додека седи на маса, ѝ подава рака на Меланија. Откако таа му ја подава својата, тој кратко ја потапкува. Подоцна се обидува да ја бакне, но се чини дека таа малку ја оддалечува главата. Овие моменти кај дел од корисниците предизвикаа потсмев и шпекулации за нивниот брачен однос, додека други не забележаа ништо необично во нивната интеракција.
Трамп и Меланија во понеделникот присуствуваа на свеченост во Белата куќа, на која претседателот потпиша извршна уредба за покренување иницијатива за унапредување на здравјето на жените. Со неа се предвидува формирање посебно одделение за здравје на жените во рамките на американскиот Национален институт за здравје, како и работна група на Белата куќа што ќе се занимава со оваа област.
Целта е да се унапредат истражувањата за болестите што особено ги погодуваат жените, да се забрза развојот на нови методи за лекување и да се подобри пристапот до здравствена заштита. Посебен акцент е ставен на примената на вештачката интелигенција во медицинските истражувања.
Меланија Трамп учествувала во подготовката на иницијативата и на настанот ја претставила својата визија за модернизација на здравствената заштита за жените во САД.
Во меѓувреме, снимката од нивната интеракција предизвика низа коментари на платформата Икс. Дел од корисниците го оценија гестот како непријатен, а други се шегуваа на сметка на присуството на Меланија на настанот. Имаше и такви што застанаа во одбрана на двојката, оценувајќи дека станува збор за вообичаена размена на нежности меѓу сопружници.
