Стефан и Мартин Филиповски од „Некст тајм“ и по 18 години заедничка кариера чувствуваат трема пред секој настап, а најголемиот страв им е дали пред сцената ќе има публика.
Во „Вечер во Охрид со Ландов и Вик“, браќата рекоа дека никогаш не им станало преку глава од музиката и од јавните настапи.
„Осумнаесет години постоиме како ‘Некст тајм’, а како браќа близнаци сме заедно 39 години и девет месеци“, се пошегуваа тие.
И покрај долгогодишното искуство, неизвесноста пред концертите, како што велат, сè уште постои.
„Никогаш не ни е доста од публиката. Едноставно, секогаш најмногу имаме трема пред настапите, со онаа помисла дали ќе има публика. Секогаш сакаме публика и многу сме благословени што имаме луѓе на нашите настани и публика за нашите песни“, рекоа Стефан и Мартин.
Тие нагласија дека се среќни што се дел од македонската музичка сцена, иако сметаат дека таа може да биде подобра.
„Се чувствуваме среќни што сме дел од оваа естрада. Каква е, таква е, меѓутоа се трудиме ние да бидеме позитивни“, порачаа од „Некст тајм“.
Според нив, досегашната кариера има три различни етапи – почетниот поп-рок период, преработките на македонски патриотски песни и новиот музички правец што го претставуваат со поновите песни.
