Нова сцена од претстојната серија за Хари Потер предизвика бурни реакции на социјалните мрежи откако гледачите забележаа дека визуелниот изглед значително се разликува од оној на оригиналните филмови. Најмногу забелешки има за избледените бои, слабиот контраст и студеното осветлување.
Сцената од адаптацијата на „ХБО“, базирана на првата книга на Џ. К. Роулинг, премиерно беше прикажана во саботата на доделувањето на наградите „Кидс чојс авордс“. Во неа Хари, Рон и Хермиона присуствуваат на свечена вечера во Хогвортс откако учениците се распределени во своите домови.
Во краткиот извадок учениците во Големата сала го скандираат името на Албус Дамблдор, кого го глуми Џон Литгоу. Хари, кого го толкува Доминик Меклафлин, го прашува Рон, во изведба на Аластер Стоут, дали Дамблдор е „малку луд“, на што тој одговара: „Да, целосно е откачен“.
Новата сцена ги обнови критиките што се појавија уште во март, по објавувањето на првиот трејлер. Дел од гледачите сметаат дека серијата изгледа бледо и вештачки, без топлината и магичната атмосфера што ги имале оригиналните филмови.
На социјалните мрежи се појавија коментари дека осветлувањето е премногу студено, а боите недоволно изразени. Некои корисници го критикуваа и изгледот на Хагрид, оценувајќи дека повеќе личи на деловен човек преправен во овој лик.
Други забележале дека на трпезите во Големата сала има помалку храна отколку во оригиналниот филм, па на шега коментирале дека инфлацијата пристигнала и во Хогвортс. Дел од обожавателите сметаат дека училиштето треба да изгледа како магично, топло и живо место, исполнето со бои и детали.
Сепак, не сите реакции се негативни. Дел од обожавателите се задоволни од изборот на актерите и очекуваат серијата повнимателно да ја следи приказната од книгите. Особено ги радуваат деталите што биле изоставени или поинаку прикажани во филмовите.
Пофалби доби и сцената во која Дамблдор разговара со професорката Мекгонагл за сличноста на Хари со неговиот татко Џејмс. Некои гледачи сметаат дека ваквите моменти ќе овозможат приказната да биде прикажана и од перспективи различни од онаа на главниот лик.
Првата сезона е дел од десетгодишниот план на „ХБО“ за нова телевизиска адаптација на книгите за Хари Потер. Премиерата е најавена за 25 декември 2026 година, на Божик.
