Скопје вчера беше центарот на вистински музички спектакл, со кој беше одбележана 35-годишнината од независноста на Македонија. Пред преполниот плоштад „Македонија“, легендарниот шпански тенор Хозе Карерас приреди незаборавна вечер исполнета со музика, емоции и големи македонски хитови.
Еден од славните „Тројца тенори“, заедно со Лучано Павароти и Пласидо Доминго, Карерас настапи со Македонската филхармонија под диригентската палка на Сашо Татарчевски, а сцената ја сподели со дел од најголемите македонски музички имиња.
Публиката со посебни емоции ги проследи настапите на Сузана Спасовска со „Земјо македонска“, Маја Оџаклиевска со „Македонско девојче“ и Каролина Гочева со „Ако згрешам, нека изгорам“.
Посебен момент беше настапот на Калиопи, која заедно со илјадници присутни ја отпеа „Бисер балкански“, додека Влатко Стефановски со гитарата ја донесе безвременската „Gipsy Song“.
Кулминација на вечерта беше заедничката изведба на „Едно име имаме“. На сцената со Карерас застанаа Влатко Стефановски, Каролина Гочева, Калиопи, Ана Дурловски, Игор Дурловски, Наум Петрески и Сузана Спасовска, а плоштадот „Македонија“ за момент се претвори во огромен хор.
Музиката, препознатливите хитови и големите имиња создадоа атмосфера која долго ќе се памети како една од највпечатливите вечери во одбележувањето на 35 години независна Македонија.
