Бојан Јовановски, познат како Боки 13, откри дека повеќе од 20 години управувал возило без возачка дозвола, а законски пропишаниот испит го положил дури на 39-годишна возраст.
Во „Вечер во Охрид со Ландов и Вик“, Јовановски нагласи дека никој не треба да го следи неговиот пример и дека сега има важечка возачка дозвола.
„Сè уште имам 39 години, следниот месец ќе наполнам 40. Минатата година, пред да стапи новиот закон за сообраќај, конечно положив за возачка дозвола. Дваесет и кусур години возев без возачка дозвола“, рече Јовановски.
Тој се пофали дека сите делови од испитот ги положил при првиот обид.
„Тоа е жива вистина. Никој да не го следи мојот пример. Едно е што сум самоук возач, но сега научив. Тестовите ги положив од прва, полигонот од прва, градското возење од прва. Сега сум во легален тек во секоја смисла“, изјави Боки 13.
