Новак Ѓоковиќ ќе се појави во новото продолжение на популарната комедија „Фокерови – пристигнува снаата“, каде што ќе има кратка улога покрај холивудските ѕвезди Роберт де Ниро, Бен Стилер и Овен Вилсон. Филмот во кината пристигнува на 25 ноември 2026 година.
За најдобриот српски тенисер ова ќе биде прво појавување на големото платно. Во една од сцените, Ѓоковиќ ќе се појави со тениски рекет во рацете, заедно со комичарот Овен Вилсон.
Во новото продолжение се враќаат познатите ликови од семејството Фокер, чии животи повторно ќе бидат исполнети со семејни недоразбирања, судири на генерации и низа комични ситуации. Во центарот на приказната е Хенри Фокер, синот на Грег и Пем, кој одлучува да се ожени со самоуверената и успешна Оливија, која ја игра Аријана Гранде. Нејзиното влегување во семејството отвора нова серија непријатни и комични ситуации.
Покрај Ѓоковиќ, во филмот настапуваат Роберт де Ниро, Бен Стилер, Аријана Гранде, Овен Вилсон, Блајт Данер и Тери Поло.
Филмот го напиша и режираше Џон Хамбург, кој учествувал и во создавањето на претходните продолженија. Продуценти се Џејн Розентал, Роберт де Ниро, Бен Стилер, Џон Лешер, Џеј Роуч и Џон Хамбург.
Франшизата започна со филмот „Нејзините родители“ од 2000 година, кој освои голем број гледачи ширум светот и прерасна во една од најуспешните комедиски серии.
Премиерата на новото продолжение е закажана за 24 ноември во 20 часот, во киното „Синеплекс Галерија“, додека редовната кинодистрибуција започнува на 25 ноември.