Малиот јонски остров Атокос, во близина на Итака, во последните години привлекува сè повеќе туристи од различни делови на светот, и тоа благодарение на неговите необични жители.
Станува збор за црни свињи кои слободно шетаат по плажите, па дури и влегуваат во морето, пишува Euronews.com.
Атокос е приватен остров кој до неодамна беше релативно непознат за пошироката јавност. Сепак, фотографиите и снимките од свињите почнаа да се шират на социјалните мрежи, особено на Instagram и TikTok, по што интересот на туристите нагло порасна.
Денес, некои патници доаѓаат на островот токму за да ги видат животните одблизу. Некои од нив дури пливаат со свињите или ги хранат.
Се чини дека животните се навикнале на присуството на луѓето. Слободно се движат долж брегот во потрага по храна и главно не им обрнуваат внимание на туристите. Кога температурите ќе се зголемат, свињите влегуваат во морето за да се разладат.
До Атокос најчесто се стигнува со туристички бродови. Ренато Биса, кој организира излети од Итака, вели дека поради зголемениот интерес секојдневно има неколку тури до островот.
Популарноста на Атокос на социјалните мрежи доведе и до развој на еден вид туристичко искуство и описи на средбите со свињите. Поради тоа, островот го доби и прекарот „Свински остров“.
Излети до Атокос се организираат и од Лефкада и Кефалонија, а Биса наведува дека бројни туристи му се јавуваат токму со желба да го посетат островот и да ги видат неговите необични жители.
Во одредени случаи, организаторите користат овошје за да ги привлечат свињите поблиску до туристичките бродови, овозможувајќи им на посетителите да ги видат од непосредна близина.
За многу туристи, средбата со овие животни претставува целосно неочекувано доживување кое долго ќе го паметат. Благодарение на социјалните мрежи, Атокос од речиси непознат остров стана атрактивна дестинација која во текот на летната сезона ја посетуваат илјадници туристи.
