Еден од познатите дуети на „ДНК“ и Магдалена Цветкоска-Ена, „Од утро до мрак“, 15 години по оригиналното објавување добива нова, современа верзија.
Ремиксот го потпишуваат диџеите Тошев, Монарх, Гокшата и Насте, кои песната ја избрале поради емоцијата што ја носи, но и со идеја старите македонски хитови повторно да добијат место во современиот музички звук.
Новата верзија носи модерна продукција, но ја задржува препознатливата мелодија и атмосфера на оригиналот, кој беше објавен во 2011 година.
Музиката и аранжманот на песната се дело на Лазар Цветковски, додека текстот го напишаа неговата сестра Магдалена Цветкоска-Ена и Владимир Блажев-Панчо.
„Од утро до мрак“ повторно беше изведена во живо во 2022 година, кога Ена беше гостинка на концертот на „ДНК“ по повод 20-годишнината од постоењето на дуото, одржан во арената „Борис Трајковски“ во Скопје.
Новата верзија на песната доаѓа во период исполнет со тешки спомени за „ДНК“ и нивните соработници. Андреј Ѓорѓиески загина на 16 март 2025 година во пожарот во дискотеката „Пулс“ во Кочани, каде што „ДНК“ настапуваше таа вечер. Во трагедијата загинаа и повеќе членови на нивниот придружен бенд и тим.
Владимир Блажев-Панчо, кој беше тешко повреден во пожарот, по речиси седум месеци лекување почина на 14 октомври 2025 година како последица на повредите.
За Лазар Цветковски, пак, Панчо често велеше дека е „како трет член на ДНК“.
