Популарната бугарска пејачка Галена привлече внимание со својата најнова песна, која го носи необичното име „ChatGPT“.
Песната е инспирирана од современиот начин на кој луѓето бараат совети и одговори за љубовта, чувствата и меѓучовечките односи, а пејачката идејата за проектот ја сподели и со своите следбеници на социјалните мрежи.
„Понекогаш луѓето се сомневаат. Во зборовите. Во чувствата. Во љубовта. А кога веќе не знаеш кому да му веруваш… почнуваш да ги прашуваш сите. Пријатели, непознати, па дури и ChatGPT. Ако еден ден и ти се посомневаш во љубовта, не прашувај ме мене. Прашај го ChatGPT“, напиша Галена.
Таа им се заблагодари на сите кои учествувале во создавањето на песната, нагласувајќи дека токму нивниот придонес помогнал идејата за „ChatGPT“ да прерасне во музичка приказна.
Новата песна веќе привлече внимание на социјалните мрежи, каде обожавателите ја коментираат необичната тема и спојот на љубовта, современата технологија и вештачката интелигенција.
