Повеќе од 20.000 граѓани синоќа присуствуваа на големата прослава по повод 50 години од основањето на Општина Гази Баба, која се одржа во Автокоманда.
Според објавата на градоначалникот Бобан Стефковски, плоштадот бил преполн со граѓани, а вечерта била исполнета со музика, забава и позитивна атмосфера.
На прославата настапија Мелани Тарчуловска, Огнен Здравковски, 2Бона, Каролина Гочева и Пеѓа Јовановиќ.
„Ова не беше само музички настан. Ова беше голем заеднички роденден — прослава на луѓето, на заедништвото и на нашата Гази Баба“, напиша Стефковски.
Тој упати благодарност до граѓаните кои присуствуваа, како и до општествено одговорните компании кои помогнале во реализацијата на програмата.
„Благодарам на секој еден од вас што беше дел од оваа историска вечер! Гази Баба, ова беше нашата вечер!“, порача градоначалникот.
Прославата беше организирана во рамки на одбележувањето на 50-годишнината од Општина Гази Баба.
