Компанијата „СпејсИкс“ во петокот успешно ја лансираше надградената ракета „Старшип В3“ од својата база во Тексас, во рамки на нов пробен лет на најголемиот и најмоќен ракетен систем во светот.
Тест-мисијата траела околу еден час, а според „Еуроњуз“, леталото исполнило поголем дел од поставените цели, пред мисијата да заврши со планирана експлозија по слетувањето во Индискиот Океан.
Меѓу клучните цели што биле успешно реализирани е и поставувањето лажни „Старлинк“ сателити, што претставува дел од тестирањата за идните вселенски мисии на компанијата на Илон Маск.
Иако летот генерално бил оценет како успешен, за време на мисијата биле регистрирани проблеми со моторите на двете фази од ракетата.
Видео-снимките од летот покажуваат како „Старшип“ се спушта кон океанот, по што експлодира при ударот во водата. Од „СпејсИкс“ посочиле дека таквиот исход бил однапред планиран како дел од тестирањето.
На лансирањето му претходело еднодневно одложување поради проблем со хидрауликата на лансирната кула.
И покрај тоа, полетувањето било успешно, а присутните набљудувачи во Тексас го поздравиле со аплауз и воодушевување.
