Со новиот албум „Кукла жива“, Тамара Тодевска отвора ново поглавје во својата музичка кариера. Албумот со десет песни и десет визуелни приказни беше претставен на промоција во Скопје, на која присуствуваа бројни музичари, соработници, автори, новинари, пријатели и претставници на културната јавност.
Настанот на едно место собра претставници од различни генерации на македонската музичка сцена, меѓу кои и долгогодишни соработници на Тодевска, продуценти, автори и партнери на проектот. Средбата прерасна во своевидно музичко дружење, со кое беше одбележано не само објавувањето на новиот албум, туку и заедништвото меѓу луѓето кои со години ја создаваат македонската музичка сцена.
„Кукла жива“ е проект кој, според Тодевска, е сон што го носела со себе целиот живот. Преку десетте песни, пејачката отвора лични теми и зборува за своите чувства, избори, падови, преиспитувања и за патот до моментот кога решила да престане да живее според очекувањата на другите.
Една од песните со особено лично значење е „Брана“, која го носи името на нејзината мајка. Во видеоспотот се појавуваат нејзината ќерка Хана и мајката на Тамара, Брана, па песната добива дополнителна емотивна димензија преку приказната за три генерации.
„Цел живот сонував за овој албум. И сега, кога конечно е реалност, нема да бидам скромна и ќе кажам – вредеше да се сонува цел живот за него. Овој албум ги дава одговорите на многу од прашањата што сте ми ги поставувале низ годините, а можеби и на некои што никогаш не сте се осмелиле да ги поставите. Создавањето на ‘Кукла жива’ ме научи дека чувствата во мене никогаш не биле погрешни. Ова е моментот кога конечно престанав да се преиспитувам и го зедов својот живот во свои раце“, порача Тодевска на промоцијата.
Следниот голем чекор за пејачката е закажан за 7 декември 2026 година, кога ќе одржи голем солистички концерт во арената „Борис Трајковски“ во Скопје. На концертот, новите песни од „Кукла жива“ ќе се најдат заедно со хитовите што ја одбележаа нејзината досегашна кариера.
