Бројни туристи кои се надеваа на сончев одмор на Тенерифе останаа изненадени откако ги дочека калима, метеоролошка појава која, како што велат, им го расипала патувањето.
Наместо ведро небо, популарната туристичка дестинација беше покриена со густ портокалов облак од прашина, па многумина го изразија своето незадоволство на социјалните мрежи.
Една туристка, на ТикТок објави видео кое покажува како изгледало таму. На снимката, направена на 31 март, таа отвора врата на балкон, но наместо очекуваниот сончев поглед, ја дочекува густа портокалова магла.
„Кога калима го погодува Тенерифе“, напишала на снимката.
Нејзиниот видео клип предизвика бројни реакции.
„Токму пристигнавме и ова не дочека“, коментирала една личност.
Друг корисник додал:
„Баш ми е драго што го избегнав ова. Имав преубав викенд.“ Дени одговорила дека е „штета“, но нагласила дека времето и натаму е „многу топло“.
И други туристи објавиле слични снимки, а некои тврделе дека песочната бура им го „уништила“ одморот.
И покрај калимата, некои посетители истакнале дека времето и натаму било топло и дека сепак успеале да уживаат во одморот, иако погледот не бил онаков каков што очекувале.
Калима е метеоролошка појава карактеристична за Канарските острови. Се работи за топол и сув ветер кој со себе носи песок и прашина од Сахара. Најчесто се јавува во зима и обично трае неколку дена, иако понекогаш може да потрае и подолго.
Властите ги предупредија жителите и туристите да бидат внимателни, бидејќи честичките прашина во воздухот можат да предизвикаат здравствени проблеми. Се советува и дополнителна претпазливост при изложување на сонце, бидејќи УВ зраците поминуваат и низ облаците прашина, па изгореници можат да настанат дури и кога видливоста е намалена.
Според пишувањето на порталот Canarian Weekly, се проценува дека облакот од прашина кој во последните денови се шири низ Канарските острови е широк околу 1.300 километри и дека оваа калима е посилна од вообичаено.
