Бритни Спирс сподели непријатно искуство со ботоксот и ги предупреди своите обожаватели да бидат особено внимателни при изборот на лекар за вакви козметички третмани.
Американската пејачка во видео на социјалните мрежи раскажа дека по еден третман лекар ѝ ставил, како што тврди, премногу ботокс околу левото око. Според неа, окото ѝ „паднало“ и останало така околу четири недели.
„Ми стави толку многу ботокс во ова лево око што ми падна вака и дури сега почнува повторно да се крева и да изгледа нормално“, рекла Спирс.
Таа ги повика жените да бидат внимателни при изборот на лекар и предупреди дека несоодветниот третман може да предизвика проблеми.
„Бидете внимателни со овие луѓе. Тие се обидуваат да го менуваат вашето лице. Внимавајте на своите тела, затоа што тие се ваши“, порача пејачката.
Во описот на видеото таа дополнително напишала: „Не можете никому да му верувате!“
Според „Кливленд клиник“, ботулинскиот токсин се користи и во козметички третмани бидејќи ги опушта мускулите што придонесуваат за појава на брчки.
Спирс во последните месеци повторно е во центарот на вниманието. Во мај признала вина за полесно кривично дело поврзано со претходното апсење за возење под дејство на алкохол и други супстанции.
