Заврши долгоочекуваното целосно затемнување на Сонцето, кое денеска привлече милиони жители и туристи во различни делови на Европа. Месечината помина пред Сонцето, а нејзината сенка се движеше од северните делови на Атлантикот кон Пиринејскиот Полуостров.
Целосното затемнување беше видливо само во тесен појас, меѓу другото, во делови од Исланд и Шпанија, додека во голем дел од Европа феноменот можеше да се набљудува како делумно затемнување.
Особено голем интерес имаше во Шпанија, каде што илјадници луѓе се собраа на различни места за да го следат спектаклот. Поради големиот број посетители, властите презедоа дополнителни безбедносни мерки.
И Македонија беше меѓу земјите од кои можеше да се следи затемнувањето, но кај нас феноменот беше видлив како делумен – Месечината покри само дел од сончевиот диск.
Затемнувањето веќе заврши, а од различни европски земји пристигнаа бројни фотографии и видеоснимки од моментите кога Сонцето постепено исчезнуваше зад Месечината.
