Лија Стјуарт (34) од Сиднеј преживеала драматичен напад од голема бела ајкула, откако четириметарскиот предатор ја нападнал додека пливала во близина на плажата Куги.
Стјуарт била во вода кога ајкулата ја каснала за ногата и рацете и почнала да ја влече под површината. Таа изгубила голема количина крв, а повредите биле толку сериозни што лекарите подоцна морале да ѝ ја ампутираат левата рака.
Во интервју за емисијата „60 Minutes“, 34-годишната мајка раскажала како изгледала борбата за живот.
„Единствената мисла во главата ми беше: ‘Нема да ме одвоиш од мојата ќерка’. Се свртев и почнав да ја удирам повторно и повторно. Чувството беше како да се борам со диносаурус“, раскажала таа.
Стјуарт непосредно пред нападот го завршила своето вообичаено саботно пливање и се упатувала кон брегот. Тогаш слушнала врисок зад себе и се свртела.
„Се свртев и видов огромна, навистина огромна перка зад неа. Беше масивна. Ја видов нејзината големина и сфатив дека не е делфин“, раскажала таа.
Ајкулата се приближила до неа, а во еден момент била на само околу 30 сантиметри од нејзиното лице.
„Се гледавме очи в очи“, вели Стјуарт, опишувајќи го предаторот со огромна уста и заби и мали, црни очи.
Иако била во животна опасност, таа решила да се бори.
„Деснак сум, па помислив: ‘Ајде со лев кроше’. Само замавнав со левата рака, а таа ме фати за подлактицата и почна да ја кине. Ми ја откина кожата, мускулите, сè. Се создаде голема дупка меѓу подлактицата и шаката“, раскажала Стјуарт.
Ајкулата потоа ја зграбила за ногата и почнала да ја влече под вода.
„Помислив: ‘Готово е, вака ќе умрам’. А потоа ми текна на ќерка ми Август. Помислив дека ќе нема мајка и дека ќе расте без мене“, вели таа.
Токму мислата на нејзината ќерка, како што раскажува, ѝ дала сила да продолжи да се бори.
„Знаев дека не смеам да ја оставам. Звучи чудно, но како да се вратив со силата на волјата“, вели Стјуарт.
Таа продолжила да ја удира ајкулата, иако борбата ја опишува како „удирање во ѕид од тули“.
„Веројатно еднаш навистина добро ја погодив, па ме пушти. Тоа беше нешто најтешко на светот, но успеав да се изборам“, раскажала таа.
Други пливачи успеале да ја извлечат на брегот, по што итно била пренесена во болница. Лекарите ја ставиле во индуцирана кома, а таа поминала низ речиси десет операции.
И покрај тешкото искуство, Стјуарт вели дека не сака да биде запаметена само како „девојката што ја нападна ајкула“.
„Јас сум жената која ја удри ајкулата со тупаница во глава“, порача таа.
За неа преку платформата GoFundMe досега се собрани повеќе од 558.000 долари.
