Бојан Јовановски, во јавноста познат како Боки 13, денеска го слави својот 40. роденден, а социјалните мрежи се преплавија со честитки, заеднички фотографии и емотивни пораки од неговите најблиски пријатели, соработници и познати личности.
Бројните сториња што беа споделени на Инстаграм сведочат за длабоките пријателства, поддршката и почитта што тој ја ужива меѓу своите блиски.
Посебно емотивна порака упати Давор Арџик, кој сподели нивна заедничка фотографија и истакна колку му значи поддршката од Боки:
„Среќен роденден на најголемата легенда што ја познавам! Не само што си најголема фаца, туку си и еден од најдобрите, најпозитивните и најдуховитите луѓе што сум ги запознал! Фала ти за сите моменти, за смеата и за тоа што ми пружи рака каква што никој никогаш не ми пружил! Остани секогаш таков каков што си и немој никогаш да се менуваш“, порача тој.
Давид Арџик исто така упати искрена честитка, нарекувајќи го Боки вистинска легенда:
„Среќен роденден на оваа легенда! Ти посакувам многу среќа, успех и нека ти се исполнат сите желби!“
Меѓу оние што упатија искрени желби за здравје и среќа беше и инфлуенсерката Марија Колинс, која сподели колаж од нивни заеднички гламурозни фотографии:
„Среќен роденден, Боки! Ти посакувам многу здравје, среќа, љубов и уште безброј убави моменти. Остани секогаш свој, насмеан и позитивен и нека ти се исполнат сите желби!“
Познатиот метеоролог Славчо Попоски му посака многу успех и кариерен напредок:
„Бато Боки, најсреќен да ми ти е роденденот, да ти се множат годините во многу здравје, среќа, љубов и мир. Уште многу, многу успеси ти посакувам во твојата кариера!“
Со специјални пораки и звуци на познати хитови се огласи и јутјуберот Ридван Мемедов, кој со музиката од култниот филм „Кум“ кратко порача: „Среќен роденден за најголемиот“, како и српската инфлуенсерка Софија Бабејиќ, која со песната „Године пролазе“ од Бајага му го честиташе роденденот.
