#ФАЦИ

Во деведесеттите изборот за Мис беше еден од најгледаните настани, а победничката преку ноќ стануваше позната: Ана Биновска повторно ѝ се врати на модата

Ана Биновска иако не е толку актуелна во јавноста, ретко кој ја има заборавено Мис на Македонија за 1998 година. Со манекенството и работата на телевизија се занимаваше кон крајот на деведесетите па се до 2009 година кога се повлече од јавната сцена. Денес е мајка на две деца, сопруга, доктор на науки од областа на менаџментот. Неодамна, после подолго време ѝ се варти на модата за да сними фотосесија со уште три познати дами од модната сцена. И ова беше доволна причина да г привлече вниманието и да се присети на времињата некогаш, но и што прави денес.

Како беше после подолго време да снимате фотосесија со уште три дами без кои во деведесеттите не можеше да се замисли модната сцена?
Чувството да се застане пред камерата и да се биде дел од модна фотосесија по многу долго време беше прекрасно. Позитивната атмосфера на самото снимање, посветеноста на целокупната екипа од „Фешн Груп“, смиреноста на фотографот Бојан Стоилковски и стајлингот на Зоран Шурбевски го изнесоа на виделина најдоброто од четирите нас. Замислата на „Фешн Груп“ беше да ја претстават есенската колекција, која е во ретро стил, преку четири дами кои го обележаа периодот на деведесеттите. Иако изборот падна на токму на нас (Тања, Светле, Вера и јас), мислам дека тој период го обележаа уште многу убави дами од модната сцена.

Како дојде до соработката и како помина дружбата со колешките? Имате ли прилика да се гледате често или обврските не ви дозволуваат?
Сите три исклучително многу ги почитувам и многу сум благодарна на „Фешн груп“ што нè покани сите заедно да бидеме дел од оваа кампања. Главна за се ова и што не обедини во овој состав беше Тања Стојановска. Беше убаво да се видиме со Тања, Светле и Вера по долго време. Дружбата за време на фотосесијата помина одлично. Позитивната енергија сè уште нè држи и по фотосесијата, така што ние четирите продолживме и приватно да се дружиме во истиот состав.

Во 2009 се повлече од јавната сцена, што правеше од тогаш наваму?
Последниот проект на телевизија го одработив во 2009 година, кога бев бремена со моето прво дете. Се работеше за емисијата „Мали тајни“ во организација на Мунлајт продукција. Во годините што следеа, се фокусирав и се реализирав на други животни полиња, пред сè како сопруга и мајка на два сина. Во 2016 година докторирав на Економскиот факултет во Скопје, на тема од областа на менаџментот, а веќе 13 години работам во компанијата А1 Македонија.

Мајка си на два сина, тие се десет години разлика? Како излегуваш на крај со еден 12 годишен скоро тинејџер и две годишно дете?
Тоа е навистина голем предизвик. Калин има 12 години и е ученик во седмо одделение, додека Илин има 2 и пол години и од септември започна да оди во градинка. Двајцата имаат сосема различни потреби и интереси и понекогаш е тешко да се направи рамнотежа. Сепак, со добра организација, поддршка од најблиските и многу љубов и трпение успевам да одржам баланс.

Беше Мис на Македонија, настан кој за последен пат се одржа во хотелот Силекс во Охрид?
Тоа беше последниот избор за „Мис на Македонија“, организиран од страна на „Екран“, кој што се одржа во хотелот „Силекс“ во Охрид. На изборот му претходеше еднонеделно заедничко дружење и патување на учесничките низ неколку градови на Македонија, во рамки на таканаречениот „Караван на убавината“. Искрено, не очекував дека токму јас ќе ја понесам титулата „Мис на Македонија“. Но, на самата финална вечер, како што главните фаворитки една по една добиваа титули, почнав да се прашувам што се случува и дали е возможно токму јас да ја понесам круната. Учесничката до мене, ме држеше за рака, велејќи ми дека јас да победам и сакаше прва да ми честита. На крајот, така и се случи. По изборот на Мис претпоставувам почнаа и понудите за реклами, ревии…

Одеднаш стана позната, како беше да се живее таа популарност?
Во тоа време, изборот за „Мис на Македонија“ беше еден од најгледаните телевизиски настани во Македонија и се пренесуваше во живо на МРТВ. Победничката на изборот, буквално преку ноќ се стекнуваше со популарност. Следната вечер, после изборот, додека со моето семејство се шетавме низ Охридската чаршија, забележавме дека сите луѓе гледаа во мене, ме препознаваа и го спомнуваа моето име. Ми беше многу чудно како одеднаш сите го знаат моето име. Само што дојдовме во Скопје, го вклучивме телевизорот и видовме дека на МРТВ се емитува наградна игра на маестралниот Игор Џамбазов. Тој телефонираше на случајни телефонски броеви и им поставуваше прашања на луѓето. Главното наградно прашање беше како се вика новата „Мис на Македонија“. На мое огромно изненадување, човекот на којшто му беше поставено прашањето го кажа моето име и доби награда за тоа. Токму тогаш, во тие моменти, започнав да ja сфаќам моќта на титулата „Мис на Македонија“. Нормално, потоа следеа многу понуди, телевизиски гостувања, светски избори, модни ревии, реклами, фотосесии, работа на телевизија. И после толку многу години, сè уште ми се случува некој да ме препознае.

Зошто се повлече од јавноста? Дали денес ти недостасуваат тие времиња?
Едноставно настаните во животот ме однесоа во друга насока и ми овозможија да се реализирам на други полиња. Тоа навистина беа убави времиња, имаше голема дружба, меѓусебна соработка и помагање. Но, лично мислам дека секое животно доба си има своја убавина. За десетина години од сега, сигурно ќе ми недостасува овој период сега, кога моите деца се мали и можам да ги гушкам и да бидам активен дел од нивниот живот. Затоа секогаш се трудам да живеам во сегашноста и да бидам благодарна на секој момент поминат со најблиските.

Се дружиш ли со некои манекенки и модели од таа генерација кои беа дел од јавната сцена? Со манекенството се занимавав на преминот од деведесеттите години кон првата декада на двеилјадитите години, па имав прилика да соработувам и да се дружам со манекенките од две различни генерации. Со некои од нив сè уште сум во контакт и приватно, а со други контактираме повеќе преку социјалните мрежи.

Кој е твојот став за убава жена, особено сега, кога ретко кога може да видиме жена без фотошоп или естетски корекции?
Во денешно време, кога ни се достапни разни козметички процедури и естетски интервенции, навистина е реткост да се сретне природно убава жена. Лично, немам ништо против естетските корекции, но само кога се направени суптилно и умерено, онолку колку што е потребно за да се прикријат ситните недостатоци и да се нагласат убавите црти на лицето. За жал, сведоци сме дека многу често се претерува со естетските корекции, како резултат на што лицето изгледа вештачко и искривено, до степен на непрепознатливост. Со тоа се губат препознатливите црти кои ставаат печат на индивидуалноста на личноста. На крај на денот, среќата и внатрешниот мир се најдобрата „естетска корекција“. Само среќна и насмеана жена е убава жена.

Александра Георгиев

Извор: Репортер.мк

Поврзани тагови:

#ФАЦИ

Петар дојде на аудиција за вработување, а јас бев во жирито, си реков ’види што убав е дечково‘: Љубовната приказна на Емра Куртишова

Македонската актерка Емра Кутришова неодамна се омажи со својот колега, актерот Петар Стојанов. По три години врска двојката реши да се венча, а свадбата беше во Гевгелија, од каде што е Петар. Емра вели дека имале преубава свадба за која сè уште се зборува. Конечно успеа да ги присобере впечатоците, па во разговор за Репортер ни ја откри и љубовната приказна со сопругот, но и како поминел подготовките околу свадбата. Зборуваме и за идните планови во однос на нејзината кариера.

„По 7 јуни, еве уште се зборува за свадбата и баш тоа ми буди радост и ми дава до знаење дека навистина гостите заедно со мене и Петар си поминаа прекрасно“, ни открива актерката Куртишова. На прашањето како сега се чувствува во брак, вели: Искрено, не е ништо поразлично бидејќи ние веќе подолг период живееме заедно. Тоа е доказ дека таа хартија не менува ништо, единствено што на некој начин се официјализира врската. Така што сè си е како што било и до сега. Единствено што сменив, е што освен што го задржав моето презиме, го додадов и неговото, и секако се тоа со заеднички договор‘, ни откри Емра, која публиката ја засака како Исура, од хит-серијата „Преспав“.

Свадбата беше во Гевгелија. Немало многу гости, туку прославата била во најтесниот круг на семејството. Но како и секоја свадба, така и оваа поминала со малку драма.

„За нервозите околу свадбата ангажирани беа сите околу мене, јас бев многу опуштена. Не знам како ми успеа, но, навистина ништо не допираше до мене, едноставно сакав да ми е мирно во душата. Но, пак не беше сè подмачкано. Бидејќи дента патувавме од Скопје и секако чичко Марфи мораше да вмеша прсти, врвот беше дека јас и Петар доцневме на сопствената свадба, не многу долго. Па кога стигнавме наместо ние да ги пречекаме гостите, се случи обратно. Сега кога ќе се присетиме на тој момент ни делува како од некоја комедија, и навистина беше смешно“, вели Емра и додава: Најважно е дека сè помина во најдобар ред, беше убава мини свадба за паметење.

Атмосферата се вжешти кога Петар го зеде микрофонот и буквално не го остави … па, со оглед на тоа колку го крена расположението се пошегував и му предложив во слободно време да пее на свадби, на што ми одговори дека ќе размисли“, се шегува актерката. Таа ни откри и дека немале обичаи бидејќи свадбата ја правеле во работен ден. Сè почнало и завршило во ресторанот, вели актерката, и затоа што биле растоварени од сите обичаи, имале повеќе време за убава веселба.

Интересна е и нивната љубовна приказна, за која Емра првпат открива во разговорот за Репортер. “ Искрено да ти кажам, љубовта почна необично и неочекувано. Во 2018 имаше аудиција за вработување на нови актери во Театарот за деца и младинци. По некоја случајност јас бев дел од жирито и тогаш прв пат го видов Петар. Кога излезе на сцената, си помислив ’види што убав е дечково хаха‘. Морам да признаам дека му личеше сцената и имаше потенцијал за да се вработи и стане дел од театарот. Така и бидна“, искрена е актерката Куртишова-Стојанова и додава: Нашиот прв заеднички процес во театарот беше претставата „Едвард раце ножици“ каде почнаа првите љубовни искри, ама од негова страна, а јас ’се држев бев ’како незаинтересирана. Тој момент не траеше долго, не можев да му одолеам и се случи љубов. Почнавме да живееме заедно и сфативме дека добро ни оди, па решивме да се земеме“.

Заедничката работа во театарот, кога се и колеги и во љубовна врска, колку и да е добра, некогаш носи непријатни моменти, кавги. Па зборуваме и за тоа, на што актерката вели: „Реално тоа до сега се нема случено, но, не е чудо да се случи. Приватноста се остава на влезот пред театарот, наша задача е со полна концентрација да си ја одиграме претставата, а проблемот да се реши по завршувањето на истата. Јас и Петар сме различни во карактерите, ама сметам дека тоа е причината зошто сме заедно. Секако дека нè привлекуваат исти нешта и тоа го прави балансот во врската“, открива таа.

Емра во моментов е во Србија, каде подолг период работи на филм и серија. Но, засега, вели таа не смее да открива многу, бидејќи сè уште е рано. И оваа година зад себе имаа успешна работа во Театарот за деца и младинци. Ни откри дека на куклениот фестивал во Подгорица, со претставата „Палешка“ таа и нејзиниот колега Мартин Јорданоски добиле награда за партнерска игра. Потоа се случила претставата „Роња“ која сè уште ги добива сите главни награди од фестивалите. „Морам да признаам дека оваа претстава е една од поубавите во нашиот театар, и топло ја препорачувам на сите оние што не ја гледале.

Во моментов во театарот се работи „Франкенштајн“ и со нетрпение ја очекуваме премиерата“, раскажува таа. Публиката ја засака како Исаура, па ја прашаме дали мисли дека е време да ѝ се врати на телевизијата и дали ќе има нова сезона на хит-серијата?

“ Преспав ми фали веќе две години, и не само мене. Публиката си го кажа своето, серијата помина со огромен успех, а, за тоа се доказ бројните пораки кои ги добивам на Инстаграм. Секоја успешна приказна си има свое продолжение, па да се надеваме дека тоа ќе се случи и со Преспав, открива Емра.

Александра Георгиев

#ФАЦИ

Пандев го гледаше Елмас во Наполи

Поранешниот капитен на Македонија, Горан Пандев присуствуваше на натпреварот во Џенова, меѓу неговиот поранешен клуб и Наполи. Имаше можност да го гледа својот наследник во репрезентацијата, Елиф Елмас, кој не се прослави на овој натпревар.

Елмас успеа да добие жолт картон по само 13 секунди игра и со тоа да собори еден неславен рекорд во историјата на италијанскиот фудбал. Напаѓачот жестоко стартуваше над противничкиот играч Гудмундсон. За потсетување, натпреварот меѓу Џенова и Наполи заврши без победник 2:2.

#ФАЦИ

Караванот „Македонијо во срце те носиме“ патува во Велес

Проектот со потписот на Скендеровски продукција, а во чии рамки 12 македонски изведувачи препеаја исто толку родољубиви песни, сите во нов аранжман од маестро Николче Мицевски, има цел да им се продолжи векот на песните и да се испрати порака особено до младите генерации за нивната земја и нејзиното наследство.