Колумбиската пејачка Шакира гостуваше во шпанската емисија „La Revuelta“, каде што со водителот Давид Бронкано се пошегуваа на сметка на нивните љубовни искуства. Кога разговорот се сврте кон нејзиниот поранешен партнер, фудбалерот Жерар Пике, пејачката имаше духовит одговор што привлече внимание.
За време на разговорот, Шакира откри дека во Мајами понекогаш разговара со синовите Милан и Саша на каталонски јазик, кога не сакаат другите да ги разберат.
„Зборувам каталонски затоа што моите синови се Каталонци. Во Мајами разговарам со нив на каталонски кога не сакаме другите да нè разбираат“, објасни пејачката.
Таа додаде дека нејзините синови меѓусебно често зборуваат англиски, додека таа се обидува со нив да комуницира на шпански и каталонски.
Изненадување за Шакира било тоа што и водителот Бронкано го зборува каталонскиот јазик. Таа го прашала дали го научил поради врска со девојка од Каталонија, а тој потврдил дека имал партнерка од тој регион.
„И двајцата сме го поминале истото“, се пошегувал Бронкано, алудирајќи на врската на Шакира со поранешниот фудбалер Жерар Пике.
Но, пејачката веднаш му возвратила:
„Е па, не знам баш дали е тоа истото“, одговорила низ смеа, без да навлегува подлабоко во темата за поранешниот партнер.
Гостувањето било необично и по начинот на кој било организирано. Наместо во вообичаеното студио на емисијата, Бронкано ја интервјуирал Шакира во комплексот „Макондо парк“ во Мадрид, каде што пејачката одржува концертни настапи во рамките на турнејата „Las Mujeres Ya No Lloran“.
Според шпанските медиуми, гостувањето било договорено во последен момент, само еден ден претходно. Водителот и неговиот тим пристигнале на локацијата, но Шакира доцнела, па морале да чекаат речиси еден час.
Бронкано, пак, морал да стигне на лет поради приватни обврски, па за разговорот им останале само петнаесетина минути. И покрај краткото време, успеале да разговараат за нејзините деца, љубовта, концертите и секојдневието.
Шакира зборувала и за високите трошоци што ги носи нејзината турнеја. Таа објаснила дека зад големите настапи стои бројна екипа и дека организацијата бара огромни финансиски средства.
„Жените заработуваат, но и трошат. На оваа турнеја работат 150 луѓе. Кога ќе пресметам колку заработувам и колку трошам, на крајот сум на исто“, рекла пејачката.
Бронкано реагирал со неверување на нејзината изјава, а разговорот продолжил во шеговит тон.
Шакира и Жерар Пике во јуни 2022 година објавија дека се разделуваат по приближно 11 години врска. Тие имаат два сина, Милан и Саша, а нивната разделба со месеци беше една од главните теми во светските медиуми.
Пејачката на врската со поранешниот фудбалер се осврна и преку музиката, особено со соработката со аргентинскиот продуцент Бизарап.
Иако Пике не бил главна тема во емисијата „La Revuelta“, водителот успеал да го спомене преку шега за нивните љубовни искуства. Со својот краток и духовит одговор, Шакира покажа дека не смета оти нивните приказни се нужно исти.
