Пејачката Кристина Арнаудова преку објава на Инстаграм упати остра критика кон дел од подкастите и нивните водители, оценувајќи дека денес секој што поседува камера се претставува како медиум, без да има соодветно знаење и професионален пристап.
Во својата објава, Арнаудова наведува дека дел од авторите на подкасти ги користат јавните личности за да стекнат популарност, поставувајќи, како што вели, „бедни и неписмени прашања“.
„Пошто сега секој што има камера може да биде медиум, времето на неписмени мочковци е почнато. Сите што не можеле да станат било што, сега имаат поткаст“, напиша Арнаудова.
Според неа, ваквите подкасти ги покануваат јавните личности со цел да ја зголемат сопствената гледаност, без да водат сметка за достоинството на гостите.
„Им се качат како пијавици и пробуваат со бедни и неписмени прашања да создадат популарност, неважно дека ќе те деградираат, ги заболе за вас“, стои во објавата.
Арнаудова упати критика и до јавните личности кои прифаќаат вакви гостувања.
„Будали сте вие што им гостувате и дозволувате на тие мочковци да прават содржина искористувајќи ве вас“, напиша таа, додавајќи дека, според неа, постојат и исклучоци, но тие се малубројни.
На крајот од објавата, пејачката објаснува дека токму поради тоа не прифаќа гостувања во подкасти.
„И тоа е одговорот зошто никогаш нема да гостувам нигде, како и досега. Башка што празни муабети се за празни глави“, напиша Арнаудова.
