Социјалната мрежа X, поранешен Твитер, воведе промени во својот алгоритам со цел да ја зголеми видливоста на објавите и коментарите од корисници кои меѓусебно се следат.
Директорот за производи на платформата, Никита Бир, објасни дека алгоритмот досега недоволно ги земал предвид таканаречените „меѓусебни следбеници“, поради што коментарите од пријатели ретко се појавувале, а дискусиите честопати биле исполнети со непознати корисници.
„Забележавме дека овие податоци недостасуваа во алгоритмот, поради што вашите пријатели многу поретко се појавуваа во одговорите на објавите. Како резултат на тоа, делот за коментари повеќе личеше на вистинско бојно поле со луѓе што воопшто не ги познавате“, изјави Бир.
Иако промената нема веднаш драстично да го измени корисничкото искуство, од компанијата очекуваат платформата повторно да стане место каде што корисниците полесно ќе комуницираат со луѓето што ги познаваат и со кои имаат заеднички интереси.
Според Бир, новиот алгоритам ќе помогне и во полесно формирање заедници околу заеднички интереси, функција што корисниците подолго време ја бараат.
Промената е дел од пошироката стратегија на X за привлекување креатори на содржини. Во текот на годинава платформата го измени и системот за монетизација, со кој се наградува оригиналната содржина, а неодамна претстави и напреден уредувач за видео што овозможува обработка на видеа директно во апликацијата.
Новите измени доаѓаат во период кога и конкурентската платформа Threads на компанијата Meta воведува функции насочени кон создавање заедници, вклучително и можност корисниците сами да го прилагодуваат алгоритмот што ја одредува содржината прикажана на нивниот почетен екран. Според компанијата, Threads неодамна достигна повеќе од 500 милиони активни корисници месечно.
