Канадскиот државјанин Конор Мука (26) признал вина за хакирање на повеќе од 165 компании, кражба на милијарди записи и уценување на неколку компании и поединци.
Неодамна Министерството за правда на САД го објави признанието на вина во соопштение за јавноста.
Мука е обвинет за хакирање на клауд-провајдерот Snowflake, што нему и на неговите соучесници им овозможило да упаднат во системите на десетици корисници на оваа компанија, меѓу кои AT&T, LendingTree и Ticketmaster. Мука украл податоци за повеќе од 100 милиони корисници на AT&T, вклучувајќи записи за повици и пораки, како и банкарски податоци, броеви на возачки дозволи и броеви на социјално осигурување од други упади.
Во текот на годините, Мука и неговите соучесници примиле повеќе од 2,5 милиони долари како откуп. Хакерот исто така добил околу 500.000 долари од продажба на податоци на жртвите на хакерски форуми, како што е озлогласениот BreachForums. Жртвите на хакерските напади на Мука и неговите соучесници претрпеле загуби од 9,5 милиони долари, наведува Министерството за правда на САД.
„Заканите и повторените уцени на Конор Мука биле пресметани и предаторски, а неговите постапки им нанеле вистинска штета на жртвите – без разлика дали станува збор за компании кои биле цел на кражба и уцена или за милиони обични луѓе кои се нивни корисници“, изјави В. Мајк Херингтон, специјален агент на ФБИ кој работел на случајот.
Мука, кој на интернет бил познат под псевдонимите Waifu и Judische, бил уапсен во Канада кон крајот на 2024 година, само неколку месеци по нападот врз Snowflake.
Во тоа време, Остин Ларсен, виш истражувач во компанијата за сајбер-безбедност Mandiant, која е во сопственост на Google и ги истражувала нападите врз Snowflake, изјавил дека Мука бил „еден од највлијателните“ хакери во 2024 година.
