Необична сцена го одбележа јуниорскиот турнир на Вимблдон, каде што 15-годишната германска тенисерка Ида Вобкер беше дисквалификувана поради неспортско однесување.
Дуелот од првото коло против Марија Поп започна лошо за Вобкер, која го загуби првиот сет со убедливи 6:0. Во вториот сет, сепак, успеа да пружи далеку посилен отпор.
При резултат 5:5, по својата 44. неизнудена грешка на мечот, младата Германка ја загуби присебноста и во знак на револт го фрли рекетот, кој заврши меѓу гледачите.
Главниот судија веднаш го прекина натпреварот и го повика супервизорот на турнирот.
Според првичните информации, никој од публиката не бил повреден, но организаторите ги применија строгите правила на Вимблдон и Меѓународната тениска федерација (ИТФ), кои не дозволуваат загрозување на безбедноста на гледачите.
Поради опасното однесување, супервизорот донесе одлука за моментална дисквалификација, а победата службено ѝ беше доделена на Марија Поп.
Освен што на неславен начин го заврши своето дебитантско учество на Вимблдон, Вобкер би можела да се соочи и со висока парична казна, која за вакви прекршоци може да достигне и до 50.000 долари.
