Хрватите на социјалната мрежа Редит отворија дискусија за тоа кој град во земјата остава најтажен впечаток, а стотици корисници ги споделија своите искуства и впечатоци од патувањата низ Хрватска.
Темата за кратко време собра голем број коментари, а меѓу градовите кои најчесто беа споменувани се најдоа Плоче, Вуковар, Риека, Книн, Сисак, Петриња и Госпиќ.
Најмногу негативни коментари доби Плоче. Според многу корисници, атмосферата во градот остава особено мрачен впечаток.
„Најдепресивен град дефинитивно е Плоче. Зградите пропаѓаат, а тагата се чувствува на секој чекор“, напиша еден од учесниците во дискусијата.
Друг корисник смета дека градот е во целосен контраст со природата што го опкружува.
„Ако го видите само градот, би помислиле дека сте некаде во поранешниот Советски Сојуз. А околу него се делтата на Неретва, морето и планините – прекрасен пејзаж“, напиша тој.
Меѓу најчесто споменуваните градови беше и Риека, но мислењата за неа беа поделени. Додека дел од корисниците ја опишаа како сива, дождлива и мрачна, други истакнаа дека е еден од најинтересните градови во Хрватска, особено поради старата архитектура и шеталиштето покрај морето. Според некои, временските услови често влијаат врз првиот впечаток.
Голем број коментари се однесуваа и на Вуковар, но не поради изгледот на градот, туку поради неговата историја. Еден корисник напиша дека по посетата на Водоторњот и Овчара неколку дена чувствувал тага и тежина.
„Тоа е место што остава силен впечаток“, наведува тој.
На листата на градови кои добија негативни оценки се најдоа и Книн, Сисак, Бенковац, Петриња, Глина, Карловац, Жупања и Госпиќ.
Еден од учесниците во дискусијата оцени дека проблемот не е само во поединечни градови, туку и во цели региони на Хрватска.
„Делови од Славонија, Банија, Лика и Горски Котар изгледаат како полека да исчезнуваат. Празни куќи, затворени локали и места во кои речиси нема луѓе оставаат многу тажен впечаток“, напиша тој.
Сепак, не сите се согласија со ваквите оценки. Дел од корисниците сметаат дека не е праведно да се носат заклучоци за еден град само врз основа на кратка посета или поминување со автомобил. Други истакнаа дека многу подепресивно изгледаат напуштените села и туристичките места надвор од сезоната.
Иако немаше едногласен одговор, според бројот на коментарите и реакциите може да се заклучи дека Плоче оставил најнегативен впечаток кај учесниците во оваа дискусија на Редит.
