Хрватските власти се осврнаа на шпекулациите за евентуално укинување на EES системот на границите за време на летната сезона и истакнаа дека ниту една држава не побарала негово укинување, и покрај незадоволството на возачите и почетокот на туристичката сезона.
За време на првомајските празници на границата меѓу Босна и Херцеговина и Хрватска беа забележани значително поголеми гужви од вообичаено, а главната причина за тоа е новиот систем за влез и излез од Европската Унија, познат како EES.
Овој систем подразбира дека сите граѓани кои ја преминуваат граничната линија излегуваат од автомобилот за да поминат низ безбедносна проверка. При пристигнување на граничниот премин на патниците им се снима лице, им се земаат отпечатоци од прсти како и податоци од пасошот.
Сето тоа дополнително го оптоварува системот на границите и предизвикува големи фрустрации меѓу возачите, па со право се поставува прашањето колку ваков систем е воопшто одржлив, особено во период на туристичка сезона.
Иако се појавија информации дека системот би можел привремено да биде суспендиран за време на туристичката сезона во одредени земји како Грција, од Министерството за внатрешни работи на Хрватска во одговор за Klix.ba се повикаа на изјавата на министерот Давор Божиновиќ кој рече дека досега ниту една држава не побарала изземање.
„Ние цело време сме во контакт со Европската комисија од која добивме одговор дека во овој момент ниту една членка на Европската заедница не поднела никаков барање за суспензија на земање биометриски податоци и целиот EES систем“, изјави тој.
Наведоа и дека од почетокот на примената на системот досега се креирани повеќе од пет милиони датотеки на луѓе кои ги оставиле податоците во EES системот.
Одреден дел од барањата е и одбиен, а од Министерството за внатрешни работи на Хрватска нагласија дека досега се одбиени 11 проценти од барањата.
„Хрватска од самиот почеток на процесот на воведување на EES системот кажуваше што правиме и како напредуваме. Ние сме една од ретките држави која од 1 март оваа година во целост почна да го применува EES системот, иако обврската беше од 10 април“, изјави министерот.
На крајот, тој се осврна и на земјите кои особено се потпираат на туризмот во летниот период.
„Мислам дека одредени туристички држави преку различни погодности сакаат да привлечат што повеќе туристи. Исто така, мислам дека EES е многу важен бидејќи пред сè гарантира безбедност. На оние кои доаѓаат во туристичка посета секако им е поважно да доаѓаат во безбедна земја отколку чекање неколку минути на граница“, нагласи министерот.
