YouTube воведува построги услови за новите креатори кои сакаат да заработуваат од својата содржина, а промените особено ќе ги погодат оние кои се фокусираат на кратки видеа.
Според новите правила, креаторите кои сакаат да започнат со заработка од реклами и претплати ќе треба да исполнат значително повисоки критериуми.
Новиот услов ќе биде најмалку 8.000 часа гледаност во последните 12 месеци или 20 милиони прегледи на кратки видеа во последните 90 дена.
Промените треба да стапат во сила на 1 февруари следната година, а нема да важат за креаторите кои веќе се дел од YouTube Partner Program.
Во моментов, за влез во програмата за монетизација, креаторите требше да имаат најмалку 1.000 претплатници и 4.000 часа гледаност во последните 12 месеци.
Алтернативно, потребни се 1.000 претплатници и 10 милиони прегледи на кратки видеа во последните 90 дена.
Со новите правила, бројот на потребни часови гледаност се удвојува, додека кај кратките видеа прагот се зголемува од 10 на 20 милиони прегледи.
YouTube дополнително воведува услов и за заработката од Shorts Creators Pool. Креаторите ќе треба да одржуваат најмалку 10 милиони прегледи на кратки видеа во период од 90 дена за да продолжат да заработуваат преку овој фонд.
Каналите кои ќе паднат под овој праг нема да бидат исфрлени од партнерската програма и ќе можат да продолжат да заработуваат од долги видеа. Заработката од Shorts повторно ќе им биде достапна откако ќе го надминат прагот од 10 милиони прегледи.
Од YouTube велат дека новите правила се воведуваат за да одговорат на огромниот раст на платформата. Според компанијата, кратките видеа денес бележат повеќе од 200 милијарди прегледи дневно, додека корисниците гледаат повеќе од една милијарда часа YouTube содржина дневно преку телевизори.
Со заострувањето на критериумите, на новите креатори ќе им биде потребно многу поголемо и поконзистентно присуство и публика пред да започнат да заработуваат од содржината.
Промените особено би можеле да влијаат врз креаторите кои се потпираат на Shorts, бидејќи за нив ќе биде потребно редовно привлекување милионска публика.
Платформата најави и проширување на поевтината претплата Premium Lite во сите земји каде што е достапен YouTube Premium.
Креаторите добиваат дел од приходите од овие претплати во зависност од времето на гледање и прегледите на нивната содржина.
Според најавата, 55 отсто од приходите одат кај креаторите на долги видеа, а 45 отсто кај креаторите на кратки видеа.
Premium Lite нуди гледање на повеќето видеа без реклами, како и можност за преземање видеа за офлајн гледање и репродукција во заднина.
YouTube не е единствената платформа која ги менува правилата за заработка. X, платформата на Илон Маск, исто така ги заостри своите насоки за монетизација, со поголем фокус на оригиналната содржина.
Во меѓувреме, Facebook воведе нова програма за монетизација со која се обидува да привлече креатори од TikTok и YouTube.
