Електричните автомобили забележаа рекорден раст на продажбата во Европа во текот на мај.
Европскиот автомобилски пазар достигна важна пресвртница. Во текот на мај, електричните автомобили за првпат беа попродавани од моделите со исклучиво бензински мотор во Европа, вклучувајќи ги земјите од Европската Унија, Велика Британија и членките на ЕФТА.
Вкупно во мај биле регистрирани околу 1,15 милиони нови автомобили, што претставува раст од 3,6 проценти во споредба со истиот месец минатата година. Електричните автомобили зазеле 23,3 проценти од пазарот, додека уделот на бензинците паднал на 21,7 проценти. Пред двата вида погон и понатаму се класичните хибриди.
Во самата Европска Унија електричните автомобили сè уште малку заостануваат зад бензинците, но разликата е минимална. Од почетокот на годината се регистрирани повеќе од 950.000 целосно електрични возила, кои сега имаат пазарен удел од 20 проценти.
Најголем раст на продажбата на електрични автомобили е забележан во Италија (+75,7%), Франција (+55,4%) и Германија (+40,9%).
Голем придонес за растот има компанијата „Тесла“, чија продажба во Европа во мај речиси се удвои. Моделот „Y“ повторно беше најпродаваниот електричен автомобил со 17.183 продадени примероци, додека моделот „3“ забележа раст на продажбата од дури 198 проценти.
Во исто време, побарувачката за автомобили со бензински мотори во Европа се намали за 18,2 проценти, додека продажбата на дизел-возила опадна за 16,6 проценти. Најголем пад на продажбата на бензинци е забележан во Франција, Шпанија и Германија.
Сè позначајна улога имаат и кинеските производители. Компанијата „БИД“ во мај за првпат стана најпродаваниот кинески автомобилски бренд во Европа, престигнувајќи го „Ем-Џи“ (SAIC Motor). Силен раст бележат и „Чери“, „Липмотор“, „Џили“ и „ЕксПенг“, потврдувајќи дека кинеските производители продолжуваат забрзано да го освојуваат европскиот пазар.
